1- Para empezar, explicarnos un poco ¿que significa el termino "La Llegra"?
Una llegra ye una ferramienta allargada que fina nun ganchu curvu y afiláu, emplegada pa trabayar la madera de les madreñes. El nome del espaciu concasa col sitiu nel que ta asitiáu, el CSOA La Madreña d'Uviéu. Una ferramienta más pa trabayar el madreñazu al sistema.
2- Donde podemos encontrar el Espacio La Llegra y como nace este proyecto.
La Llegra surde tres d'un aconceyamientu ente ventipicu persones de la redolada de la esqueirda soberanista que veníemos coincidiendo en munchos sitios y que víemos la necesidá de tener un espaciu de visibilización y alderique. Ye por ello qu'ente otres opciones salió la d'entamar a participar nel CSOA La Madreña, qu'acoyó con bon aquel la iniciativa.
3- ¿Que relación os une con el CSOA La Madreña? ¿Colaborais activamente con el centro?
El CSOA La Madreña vien desendolcando un llabor impagable de denuncia de la corrupción política y la especulación urbanística n'Uviéu dende va más de dos años. Nesi sen, el nuesu compromisu ye'l de sofitar les actividaes que se xeneren nel CSOA y participar na asamblea y les actividaes que se proponen. La Llegra nun quier ser un espaciu herméticu que namái faiga un usu prácticu del CSOA La Madreña, sinón que tien por envís intercambiar idées y puntos de vista con tola montonera de persones y coleutivos que pasen perellí p'arriquecer tolos discursos bidireccionalmente.
4- ¿Que podemos encontrar y cuales son los objetivos de "La Llegra"? ¿que actividades realizasteis hasta el momento?
Pel momentu, dende entamos d'esti añu l'actividá foi l'encuriosar un llocal, que quedó bien afayadizu, y la instalación de lluz nesti cuartu y otres zones del CSOA. Llueu, en febreru, diseñamos un mes con 3 actividaes que fueron una espicha de presentación, una charra sobre soberanía enerxética y un cinefórum cola mesma temática.
Los oxetivos de La Llegra son ufrir un espaciu pa la esquierda soberanista nel que poder aldericar y conocenos, independientemente de ser militantes d'organizaciones o non. Tamién, la visibilización social y l'esparder propaganda, pegatines o material de distintos coleutivos son importantes. Asina, nesti primer mes organizaciones como la Xunta Estudiantil Asturiana, Darréu, Conceyu Abiertu o Compromisu por Asturies vienen d'organizar conceyos de calter internu en La Llegra, lo que yá nos paez un éxitu en sí mesmu. Tamién collaboramos con otros coleutivos como Paraos y Precaries d'Uviéu que tá trabayando en diseñar comedores y despenses populares nel centru y col proyeutu d'Alderiques d'Asturies va facer una grabación de programa y folixa de presentación en La Llegra.
5- ¿Teneis algun tipo de asamblea periodica? explicarnos un poco como es vuestro funcionamiento y como se puede participar en este espacio.
Sí. La Llegra tien una doble vertiente. D'una banda, ye un espaciu abiertu pa dexar información, material, organizar charres, conceyos o lo que se quiera per parte de persones o coleutivos. D'otra banda, tien una actividá propia que diseña una asamblea abierta qu'aconceya los primeros y terceros xueves de cada mes a les 19.30 hores nel mesmu CSOA. Esi ye'l muérganu de participación y diseñu d'actividaes mensual. Lo meyor y más práutico ye que vos averéis a conocela, ¡que nun mordemos pel momentu!.
6- Llevais poco tiempo funcionando, ¿como fue la acogida de la gente?
La verdá ye que, de mano, tamos contentes. Paeznos que'l proyeutu entama con puxu y nes actividaes presta ver la presencia de xente mozo con ganes pa trabayar. Sabemos que va llevanos muncha xera y qu'hai qu'ameyorar una bayura de coses pero paez que la xente respuende y que van garrándose dinámiques prestoses.
7- ¿Como surge la necesidad de crear este espacio? ¿Conocéis algún antecendente similar en Asturies?
Como dicíemos enantes, surde depués d'un conceyu abiertu ente ventipicu persones que convocáremos nel mes d'avientu pasáu y decidimos tirar p'alantre.
En cuantes a los antecedentes, tenemos munchos referentes n'Asturies nos que tien participao la esquierda soberanista xunto con otres xentes y coleutivos. Dende les okupaciones d'El Gaviluetu o la ReFLEXón, n'Avilés y Xixón a los CS Sestaferia de Xixón, La Semiente en L'Entregu, agora La Fábrica en Mieres...ensin escaecer les esperiencies de los Llares d'Andecha y tantos otros que se nos escaecerán.
Esisten tamién otros referentes a nivel internacional de xestión asamblearia y participación abierta que nos presten, como los casals y ateneus nel casu de la esquierda soberanista nos Paisos Catalans.
8- Realizasteis hace poco una charla sobre la Soberanía Energética en Asturies. ¿Que otros temas teneis pensado tocar en futuras actividades?
Esti mes de marzu tamos pa sacar una programación que va tar centrada na reivindicación del 8 de marzu, cola tema de la prostitución n'Asturies.
La idea ye de sacar cada mes una temática y venceyala cola realidá nacional asturiana, porque ser soberanista asturianu/a ye muncho más que falar de llingua, cultura o territorialidá. Ye falar de los problemes y necesidaes del pueblu asturianu. Asina, temátiques como la soberanía alimentaria, l'agroganadería, les custiones de xéneru y ambientales y tamién el derechu a decidir, la llingua y cultura van ser puntos a tocar nestos meses.
9- Además de la charla, tambien os animasteis con una espicha-presentanción del espacio y una proyección de la película "Cenizas del Cielo"
¿Cuales son vuestros planes en corto-medio plazo? ¿Seguireis en la linea de estas actividades o tenéis pensado alguna otra actividad?
Proponémonos el facer meses "temáticos" pa nun afoganos pel momentu na nuesa actividá, onde incluyamos conciertinos, espiches o cinefórums, porque consideramos que l'ociu tamién ha de politizase y porque son sides perfeutes p'alcontranos y charrar, conocenos y aldericar.
Pel momentu l'oxetivu ye siguir ufriendo actividaes y afalando a la xente pa que participe y que los alderiques seyan cada vegada más arriquecedores.
Como retos pal futuru tán dalgunes coses distintes, como proponer un grupu de monte de La Madreña o facer talleres de llectura mensual n'asturianu...
10- Para terminar, ¿como se puede contactar con vosotros o mantenerse informado de vuestras actividades?
Al traviés de les redes sociales, colos perfiles de Twitter @La_Llegra y "Espaciu La Llegra" en Facebook o nel corréu espaciulallegra@gmail.com
Tamién podéis averavos a los conceyos abiertos los primeros y terceros xueves de ca mes o peles asamblées del CSOA los llunes a les 20h.
.jpg)
