Coincidiendo col so 30 aniversariu, la Corriente Sindical
d’Izquierda d’Asturies cellebró’l so VI Congresu esta fin de selmana en
Xixón. El sindicatu de clase asturianu debatió les llínees d’actuación
pa los prósimos 4 años y escoyó les persones que conformarán los sos
muérganos directivos. Samuel Fernández foi reellexíu como secretariu
xeneral, al frente d’una comisión executiva renovada.
La Corriente Sindical d’Izquierda bien de celebrar el VI Congresu
onde se debatieron cinco ponencies sobre aspectos organizativos y llínea
d’acción sindical. El tonu común a toes elles foi la necesidá de
construir la llucha sindical en momentos d’enorme retrocesu de los
derechos llaborales como los d’anguaño, y la urxencia de vertebrar un
movimientu colos sectores más desfavorecíos de la sociedá civil, como
son los desempleaos y los trabayadores precarios.
Namás concurría una llista al órganu de direición, con Sam,uel
Fernández al frente y que se podía considerar como continuista. Nella
converxen hestóricos del movimientu obreru asturianu, una renovación
xeneración encarnada por sindicalistes más mozos y una representación
de sectores como’l de los trabayadores precarios y los paraos.
La CSI espoxigó un 55%nl’afiliación nos años caberos, 4.000 afiliaes y
afiliaos, más de 400 representantes sindicales. En pallabres de Samuel
Fernández, "el proyectu de la Corriente tien que ser la manifestación,
la barricada, la movilización, tolos díes que podamos. Tenemos otru
retu, la fuelga xeneral. Tenemos que salir a la cai, convoque quien
convoque".
Al Congresu asistieron representaciones de los sindicatos LAB (Euskal
Herría), SAT (Andalucía), Co.Bas (Madrid), Coordinadora Sindical
(Madrid), CIG (Galiza), CUT (Colombia) y del sindicalismu británicu que
ficieron intervenciones pa desplicar les sos diferentes ámbitos
d’acción.
