Vistas de página en total

lunes, 10 de diciembre de 2012

El mozu senegalés deteníu pola Brigada d’Extranxería llogra evitar la espulsión


Oumar ta de vuelta en Asturies. Al llegar a Madrid entendió que diba ser deportáu gracies a un compañeru que viaxaba nel mesmu avión con destín a Dakar y col que se taba en contactu telefónicu. La policía mintiéra-y diciéndo-y qu’en Madrid el so casu sería revisáu nun xulgáu. Asina que mientres el transbordu en Madrid resistiose a ser embarcáu.

Sobrevivir nun ye delitu

Esti mozu senegalés fuera deteníu’l xueves 6 d’avientu, coincidiendo col Día de la Constitución española, en Ribesella (xuntu con otros trés compañeros) por "vienta illegal”; esto ye, por tratar de sobrevivir vendiendo bolsos o DVDs na cai.
Nun cometiera nengún delitu nos cinco años que llevaba en Asturies, si acasu’l mesmu que la mayor parte de nós, buscase la vida. El xuez tuvolo en cuenta y el mesmu vienres nun autorizó’l so internamientu nun CIE. Sicasí, la policía nacional tenía la intención d’estirar al máximu les 72 h d’arrestu -inclusive les superó- pa utilizar un vuelu comercial con transbordu en Madrid y destín Dakar pa espulsa-y. Nun van faer lo mesmo con Díaz Ferrán.
Dende la Ruta contra’l racismu y la represión convocose’l vienres, con caracter d’urxencia, una concentración delantre de la comisaría d’El Natahoyo de Xixón. L’asamblea ellí celebrada decidió siguir la protesta a pesar de que llegalmente paecíen desapaecer les posibilidaes. La única solución yera que la tripulación y el pasaxe del vuelu se negase a volar con una persona conducida a encomalo, polo que se realizó un actu informativu nes mesmes puertes d’embarque del aeropuertu de Ranón, al qu’asistieron unos venticinco persones. L’acción tuvo bona acoyida y munches persones taben dispuestes a negase a permanecer sentaes mientres s’espulsaba a una persona que nun cometiera nengún crime.
Namás los pasaxeros sentaos cerca pudieron dase cuenta qu’embarcaren a Oumar el primeru, que tuvo’l coraxe de venir dende Senegal, pero que quiciabes nesi momentu nun tuvo les abondes fuerces p’aguantar. Setenta y dos hores de desesperación nos cuartones, y la promesa de que nun taba siendo realmente espulsáu, fixeren l’abonda esmornia.
Paecía que la protesta nun llograra’l so oxetivu. Sicasí, gracies al fechu de concentrase nel aeropuertu, pudo contautase con un pasaxeru que-y desplicó a Oumar la so situación real y lo que tenía de faer al llegar a Madrid. Gracies a la so resistencia activa y al fechu de que yá trescurriera’l períodu máximu de detención, la Policía Nacional viose obligada a ponelu en llibertá, tornando hores dempués n’autobús a Uviéu.

30 persones son espulsaes diariamente nel Estáu español

La detención de Oumar nun ye un fechu aislláu. Una media de 30 persones ye espulsada al día como resultáu de los millones d’identificaciones racistes que la policía realiza añalmente nel Estáu español. Decenes de miles son internaes nos CIEs (Centros d’Internamientu d’Estranxeros), los Guantánamos españoles. Y otres son espulsaes nes 72 hores siguientes a la so detención.
Diverses organizaciones en tol Estáu vienen sollertando sobre la esistencia de vuelos de repatriación conxuntos (enllenando un avión con persones inmigrantes) o vuelos comerciales onde, si “ye necesariu” pola fuerza , son treslladaes estes persones contra la so voluntá. En dalguna ocasión estos vuelos terminaron cola muerte de la persona espulsada: ye’l casu de Osamuyi Aikpitanyi, afogáu por dos policías qu’aplicaben dicha violencia “necesaria”. Paez ser que pal Estáu español la espulsión de persones migrantes ye más importante que’l respetu polos Derechos Humanos, y estos vuelos repitir ante la desidia cómpliz de consulaos y gobiernos que roblen alcuerdos –munches vegaes desconocíos pa les nueses sociedaes– onde nun se contempla en nengún momentu’l respetu a les persones que sufren la espulsión.