Vistas de página en total

viernes, 15 de febrero de 2013

CONCENTRACIÓN ANTIFACISTA



Esti sábadu 16 de febreru grupos neonazis d’Asturies convoquen a una conferencia de calter facista, y quieren cellebralo nun espaciu públicu, cedíu pol ayuntamientu de Xixón, el salón d’actos del Antiguu Institutu. Por esti motivu la Plataforma contra la Represión y poles Llibertaes anuncia una concentración de repulsa a les 19:15h na Plaza’l Parchis.

Diverses organizaciones de la esquierda asturiana denuncien que nel marcu d’unes Xornaes d’Hestoria Militar, esti sábadu a les 19:00 hores nel Centru Cultural Antiguu Institutu, va cellebrase una conferencia que lleva por titulu “Krasny-Bor, la última gran batalla de la historia militar española”. Durante la II Guerra Mundial hubo en Krasny-Bor un enfrentamientu nel que participó la 250ª División de Voluntarios Españoles de la Wehrmacht, más conocida como la División Azul. 
La conferencia tará al cargu de Carlos Caballero Jurado, un escritor conocíu pola so vinculación con ámbitos ultraderechistes, qu’inclusive tien un llibru publicáu por Ediciones Nueva República, editorial d’enclinos nacional-socialistes. Igualmente dellos grupúsculos del facismu llocal yá tán convocando a los sos siguidores y anunciando esta conferencia como un actu d’alcordanza y homenaxe a los “españoles caídos en la lucha por defender a Europa del comunismo y del sionismo”.

La Plataforma contra la Represión y poles Llibertaes considera escandalosu y especialmente esmolecedor polos nuevos tiempos que vienen, que se dexe a individuos d’ideoloxía facista "poder realizar actividaes nel marcu d’instituciones públiques mientres que’l Gobiernu municipal utiliza al cuerpu de Policía Local a manera de somatén facista pa reprimir, escorrer y detener a trabayadores (como asocedió na última fuelga xeneral)".

Dende Darréu, organización de la mocedá d’izquierda soberanista, quieren denunciar públicamente "l’actitú permisiva del gobiernu llocal de Xixón, de Foro Asturias, pa con esti tipu de grupos qu’operen na ciudá de Xixón como quieren. Tamién vemos como un insultu a los valores democráticos, solidarios y de tolerancia’l fechu de que l’Ayuntamientu de Carmen Moriyón dea espacios públicos a esti tipu de coleutivos". Por eso piden al Ayuntamientu de Xixón, "agora qu’hai tiempu, que rectifique y prohiba esti tipu d’actos na ciudá, que son una falta de respetu a los xixoneses, los asturianos y la propia humanidá entera. Nun se pueden tolerar actos, por mui historicistes que quieran vendénoslos, qu’atenten escontra los Drechos Humanos y los valores mínimos de solidaridá, tolerancia ya igualdá".

No hay comentarios:

Publicar un comentario