Vistas de página en total

jueves, 14 de marzo de 2013

"Tanta permisividá colos actos facistes busca amedranar la respuesta social"


Grupos de neonazis convoquen a un homenaxe n’Asturies a Josué Estébanez, l’asesín Carlos Palomino, mozu antifacista acuchilláu nel metru de Madrid. L’Asamblea Abierta Antifascista denuncia esti fechu y fae responsable de lo que pueda asoceder a la delegación de gobiernu y a la Brigada d’Información de la Policía Nacional.
Grupos neonazis faen pública una convocatoria a nivel estatal pa homenaxear n’Asturies él próximu sábadu día 16 a Josué Estébanez de la Hija, asesín del mozu antifacista Carlos Palomino, de 16 años, apuñaláu por Estébanez nel metru de Madrid en payares de 2007. Estébanez ta nel módulu terapéuticu de la prisión de Villabona, beneficiándose inexplicablemente de les ventayes del mesmu.

Esti tipu de convocatories coincide con una esguilada d’actos de violencia neonazi empecipiaes a partir del arquivu de la causa abierta contra un grupu de facistes venceyaos a la peña sportinguista Ultraboys, pola agresión que sufrieron siguidores del Génoa en Xixón, a manos d’ultres sportinguistes. Los mesmos que salieron impunes d’esi actu violentu, a los dos selmanes del arquivu d’esa causa, asaltaron el campu del U.C. Ceares, afrellando a unos de los sos directivos. Esti mesmu grupu tamién intentó españar la manifestación estudiantil por una universidá pública n’Uviéu en payares de 2012 y apocayá fueron espulsaos d’una manifestación contra los desahucios en Xixón, ente amenaces y agresiones a los asistentes.
"Amás d’estos actos públicos que tresciende, tamién protagonicen un ensame d’agresiones de les cuales salen impunes puesto que les víctimes nun suelen atrevese a denunciar pol pocu enfotu qu’inspira anguaño la Brigada d’Información, encargada de xestionar esti tipu de delitos, como’l casu del Genoa", afirmen dende l’Asamblea Abierta Antifacista. Esti colectivu públicu denuncia tamién que se permita l’actu d’apoyu al asesín de Carlos Palomino, y faen responsable de lo que pueda asoceder el próximu sábadu n’Asturies a la delegación de gobiernu y a la Brigada d’Información de la Policía Nacional, al desconocer cómo, ónde y cuándo van realizar esti homenaxe los neonazis.
"Acaldía ta alimentándose más la idea de que tanta impunidá pa colos fascistes tien como oxetivu amedranar y apavoriar a los activistes de los movimientos sociales", reflexonen dende la Asamblea.


No hay comentarios:

Publicar un comentario