lunes, 14 de enero de 2013

Concierto de sofitu a Radio Sele

Skama la Rede, La Tarrancha y La Curuxa sedrán los grupos n'escena, nesti conciertu d'apoyu económicu a Radio Sele.
Dientru de les iniciatives en sofitu a la radio llibre qu'emite dafechu n'asturianu, Radio Sele, los grupos Skama la Rede, La Tarrancha y La Curuxa conformen el cartelu d'un conciertu que tendrá llugar n'Antigua Estación d'Uviéu el sábadu 26 de Xineru a les 20:00, con un bonu d'ayuda de 6 euros como entrada destinada a atropar fondos económicos que permitan el caltenimientu de l'actividá d'esta radio comunitaria asitiada nel conceyu d'Uviéu.
Radio Sele fizo pública va más d'un mes la so situación, con dificultaes económiques pal pagu del llocal nel que desendolquen la so actividá. Poro, punxeron a dimposición del pueblu asturianu una cuenta bancaria na que facer les aportaciones pal caltenimientu de la única radio qu'emite totalmente en llingua asturiana. Dientru de les actividaes solidaries, l'afición del Real Uviéu dimpuso urnes nel Carlos Tartiere durante un partíu pa recaldar fondos pa esta radio, que como'l restu de les radios comunitaries asturianes, sufre la persecución institucional con amenaces de multes y torgues pa la emisión pela FM.
Según informaron dende Radio Sele, la cantidá necesaria pa caltener l'actividá durante un añu son 6.000 euros, de los qu'anguaño lleven atropaos poco más de 1.500. Poro, faen un llamamientu a la collaboración pa consiguir les cifres económiques necesaries, siendo la forma más cenciella la tresferencia a la cuenta de l'Asociación Cultural Secha na Caxa Rural 3059 0001 18 2366328629.

No hay comentarios:

Publicar un comentario