domingo, 6 de enero de 2013

CSI solidarízase col mineru represaliáu

La Corriente Sindical d’Izquierda manifiesta la so solidaridá col mineru condergáu a un añu y diez meses de prisión y una multa de casi 7.000 euros, y que taba acusáu de participar nuna barricada y allanciar un volador escontra un helicópteru de la Guardia Civil. 

 
Dende CSI describen la situación, con "Delincuentes habituales, qu'amasen fortunes arruinando a miles de families, reciben la so “recompensa” con altos cargos direutivos n'empreses multinacionales, demientres los y les trabayadores son condergaos a penes de prisión por defender el so puestu de trabayu y un sueldu miserable [...] Acusaciones d'atentáu a l'autoridá y desordes públicos son castigaes con penes de cárcel, mentantu la represión yá ye xeneralizada y puede cayer sobre cualisquier presona que tenga l'escurrimientu de realizar cualisquier triba protesta [...] Palices, cargues policiales brutales, detenciones arbitraries, persones hospitalizaes polos golpes recibíos, xente que pierde güeyos, policías condergaos ya indultaos por tortures y hasta un muertu n’Euskal Herría pola mor d’un pelotazu de goma... Too ello na más absoluta impunidá ensin que, en nengún momentu, la policía paeza tar subordinada a los drechos ciudadanos y les lleis vixentes".
Dende la Corriente despliquen que "N’Asturies son munches les persones encausaes por defender los drechos de la clas obrera y, d'equí p'arriba, los xuicios van dir cayendo en cascada. Agora nun podemos dexales soles, porque'l so únicu delitu foi defender los sos derechos y los drechos de toos y toes". Poro, faen "un llamamientu a tolos sindicatos de clas pa superar diferencies y pa que, xuntos o por separtáu, dediquemos los nuesos esfuerzos y los nuesos recursos a algamar la llibertá y l'absolución ensin cargos de quienes tán siendo condergaos por defender los drechos más básicos".
Dende CSI afiten tamién que "Si nun lo faemos asina, vamos perder el sofitu de la clas obrera a la que dicimos defender y bien pocos trabayadores van tornar confiar en nós nin, muncho menos, van tornar a correr el riesgu de participar nes nueses movilizaciones".
Pa finar, dende'l sindicatu remembren les pallabres pronunciaes por ún de los deteníos el 14-P, a la salida de los xulgaos:
“Nun ye la primer vegada que tamos equí, nos xulgaos. Nin va ser la postrera. Nun sedríe la primer vegada que podemos entrar na cárcel. Tampoco va ser la postrera. Pero sí ye la primer vegada que vemos colos nuesos propios güeyos cómo una xeneración ta condergada a vivir peor que l'anterior.
A los y les trabayadores nunca nos dexaron otru remediu qu’algamar los nuesos drechos a base de recibir golpes, detenciones, represión y cárcel. Nun ye prestosu, pero nun tenemos otra igua si queremos que la clas obrera siga avanzando y nun de pasos tras.
La llucha tien de siguir. Tenemos de siguir engarrando. Faigámoslo por nos y, sobretou, hagámoslo polos nuesos fíos y fíes”.